ଅହମ୍ମଦାବାଦ: ଗୁଜୁରାଟରେ ବିଧାନସଭା ନିର୍ବାଚନ ପାଖେଇ ଆସୁଥିବାବେଳେ ରାଜନୈତିକ ତାତି ମଧ୍ୟ ବଢିଛି | ଗୁଜରାଟ କଂଗ୍ରେସ ନେତା କୈଳାଶ ଗାଢ଼ବି ରବିବାର ଦିନ ଆମ୍ ଆଦମୀ ପାର୍ଟିରେ ଯୋଗ ଦେଇଛନ୍ତି ଏବଂ କହିଛନ୍ତି ଯେ ସେ ରାଜ୍ୟରେ “ଅହଂକାରୀ” ବିଜେପି ସରକାର ସହ ସେ ଲଢେଇ ଜାରି ରଖିବେ । କଂଗ୍ରେସର ପୂର୍ବତନ ମୁଖପାତ୍ର କୈଳାଶ ଗାଢ଼ବି ଗତକାଲି ଦିଲ୍ଲୀର ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ଭେଟିଥିଲେ |
ଆଜି ସେ ନିଜର ପ୍ରାୟ ୩୦୦ ସମର୍ଥକଙ୍କ ସହ ଆପରେ ଯୋଗ ଦେଇଛନ୍ତି | କୈଳାଶ ଗାଢ଼ବି କହିଛନ୍ତି ଯେ ଗୁଜରାଟରେ ବିଜେପି ସରକାର ସ୍ୱାସ୍ଥ୍ୟ, ଶିକ୍ଷା ସହିତ ଲୋକଙ୍କୁ ସୁରକ୍ଷା ଏବଂ ରୋଜଗାର ଯୋଗାଇବାରେ ବିଫଳ ହୋଇଛନ୍ତି। ସେ କହିଛନ୍ତି ଯେ ଶାସକ ସରକାର ୨୭ ବର୍ଷ ଶାସନ କାଳରେ ରାଜ୍ୟକୁ “ରାଜନୀତିର ପରୀକ୍ଷାଗାର” କରିଛନ୍ତି। ଦିଲ୍ଲୀର ଆପ ବିଧାୟକ ତଥା ଦଳର ଗୁଜୁରାଟର ଦାୟିତ୍ୱରେ ଥିବା ଗୁଲାବ ସିଂ ରାଜପୁତ କହିଛନ୍ତି ଯେ ଏଠାରେ ବିଜେପି ଓ କଂଗ୍ରେସର ନେତାମାନେ ତାଙ୍କ ଦଳରେ ଯୋଗଦେବା ଏକ ଉତ୍ସାହଜନକ ସଙ୍କେତ।
ସେ ଆହୁରି ମଧ୍ୟ ଦାବି କରିଛନ୍ତି ଯେ ଚଳିତ ବର୍ଷ ଶେଷରେ ନିର୍ବାଚନ ହେବାକୁ ଥିବା ରାଜ୍ୟରେ ଆହୁରି ବଡ ଚେହେରା ମଧ୍ୟ ଆପରେ ଯୋଗଦେବେ। ଚର୍ଚ୍ଚା ମୁତାବକ କଂଗ୍ରେସ ନେତା ହାର୍ଦ୍ଦିକ ପଟେଲ ମଧ୍ୟ ଆପରେ ଯୋଗ ଦେଇପାରନ୍ତି | ସେ କଂଗ୍ରେସକୁ ନେଇ ଥିବା ଅସନ୍ତୋଷକୁ ଖୋଲାଖୋଲି ଜାହିର କରିଥିବାବେଳେ ଆପ ମଧ୍ୟ ତାଙ୍କୁ ଦଳରେ ମିଶିବାକୁ ଅଫର ଦେଇଥିଲା |
