ଦାରିଙ୍ଗବାଡ଼ି (୮/୩) : ଦାରିଙ୍ଗବାଡ଼ି ସ୍ଥିତ ସାରିଙ୍ଗରିପି ଗ୍ରାମ ଠାରେ ଜାଗୃତି,ଅନ୍ତରଙ୍ଗ ଓ ନାରୀ ମହାସଂଘ ପକ୍ଷରୁ ଆନ୍ତର୍ଜାତିକ ମହିଳା ଦିବସ ପାଳନ ହୋଇଯାଇଛି । ଏହି ଅବସରରେ ଜିଲ୍ଲା କୃଷି ଅଧିକାର ପ୍ରଶାନ୍ତ କୁମାର ଶତପଥୀ ,ଦାରିଙ୍ଗବାଡ଼ି ବିଡ଼ିଓ ଗଦାଧର ପାତ୍ର,ଗାନ୍ଧୀ ଶାନ୍ତି ପ୍ରତିଷ୍ଠାନର ମାନସ ମିଶ୍ର,ସାମାଜିକ କର୍ମୀ ସୋମ,ନାରୀ ସଭାନେତ୍ରୀ ନମଜିନି ମଳିକ ପ୍ରମୁଖ ଅତିଥି ଭାବେ ଯୋଗ ଦେଇଥିଲେ ।
ବିଡ଼ିଓ ଗଦାଧର ପାତ୍ର କବିତା ମାଧ୍ୟମରେ ମହିଳାଙ୍କୁ ସମ୍ବୋଧନ କରିବା ସହ ସେମାନଙ୍କ ସାହସ ଓ କାର୍ଯ୍ୟକୁ ସନମାନ ଜଣାଇଥିଲେ । ଦାରିଙ୍ଗବାଡ଼ି ବ୍ଲକରେ ନୂତନ ଭାବେ ନିର୍ବାଚିତ ହୋଇଥିବା ସମସ୍ତ ମହିଳା ସରପଞ୍ଚ ଓ ନାରୀ ନେତ୍ରୀଙ୍କୁ ପୁଷ୍ପଗୁଚ୍ଛ ସହ ଅଙ୍ଗବସ୍ତ୍ର ଦେଇ ସନମାନିତ କରାଯାଇଥିଲା । ଜାଗୃତି ସମ୍ପାଦକ କୈଳାସ ଚନ୍ଦ୍ର ଦଣ୍ଡପାଟଙ୍କ ତତ୍ୱାବଧାନ କ୍ରମେ କାର୍ଯ୍ୟକ୍ରମ ପରିଚାଳନା ହୋଇଥିବା ବେଳେ ଲୁସିମା ପ୍ରଧାନ ମଞ୍ଚ ପରିଚାଳନ କରିଥିଲେ ।। କାର୍ଯ୍ୟକ୍ରମରେ ଜାଗୃତିର କର୍ମଚାରୀ ଓ ଅନ୍ତରଙ୍ଗ କର୍ମଚାରୀ ମାନେ ସହଯୋଗ କରିଥିବା ବେଳେ ଶତାଧିକ ମହିଳା ଉପସ୍ଥିତ ଥିଲେ । ସେହିପରି ସିମନବାଡ଼ି ସ୍ଥିତ ସଲାବାଡ଼ି ଗ୍ରାମରେ ମଧ୍ୟ ବିଜୟଲଷ୍ମୀ ପାଲାକାଙ୍କ ତତ୍ୱାବଧାନ କ୍ରମେ ଏକାଧିକ ମହିଳାଙ୍କ ଉପସ୍ଥିତିରେ ଆନ୍ତର୍ଜାତୀୟ ମହିଳା ଦିବସ ପାଳନ କରା ଯାଇଥିବା ବେଳେ , ହାତିମୁଣ୍ଡା ଗ୍ରାମ ପଞ୍ଚାୟତ ଅଧିନସ୍ତ ତାମଙ୍ଗି ଗ୍ରାମରେ ମହିଳା ଦିବସ ପାଳନ କରିଥିବା ଖବର ହସ୍ତଗତ ହୋଇଛି
