ହିଞ୍ଜିଳିକାଟୁ : ବେଲଗାଁ ଥାନା ଅଞ୍ଚଳର ଜୈନିକା ୨୮ ବର୍ଷିୟା ବିବାହିତା ମହିଳାଙ୍କୁ ବଳପୂର୍ବକ ଦୁର୍ଷ୍କମ ସହ ହତ୍ୟା ଉଦ୍ୟମ ଅଭିଯୋଗରେ ବେଲଗାଁ ପୁଲିସ ଜଣେ ଯୁବକଙ୍କୁ ବୁଧବାର ଗିରଫ କରିଛି । ଗିରଫ ଯୁବକ ଜଣଙ୍କ ହେଲେ ବେଲଗାଁ ଥାନା ହନ୍ତୋଷ ଗ୍ରାମର ଅରୁଣ ବସ୍ତିଆ । ଏ ନେଇ ବେଲଗଁ ଥାନାରେ କେସ ନଂ- ୧୦୩/୨୪ରେ ଏକ ମାମଲା ରୁଜୁ କରି ଗିରଫ ଅରୁଣଙ୍କୁ କୋର୍ଟ ଚାଲାଣ କରାଯାଇଥିବା ବେଲଗାଁ ଥାନା ଆଇଆଇସି ସ୍ମିତାଞ୍ଜଳି ପ୍ରଧାନଙ୍କ ସୂତ୍ରରୁ ପ୍ରକାଶ ।
ପୁଲିସ ସୂତ୍ରରୁ ପ୍ରକାଶ ଯେ, ଗତ ୨୧ ତାରିଖ ଦିନ ସକାଳେ ବେଲଗାଁ ଥାନା ଅଞ୍ଚଳର ଜଣେ ବିବାହିତା ମହିଳା ଘରେ ଏକାକୀ ଥିବା ବେଳେ ହନ୍ତୋଷ ଗ୍ରାମର ଅରୁଣ ବସ୍ତିଆ ମହିଳାଙ୍କ ଘରେ ପଶି ବଳପୂର୍ବକ ଦୁର୍ଷ୍କମ କରିଥିଲେ । ମହିଳା ଜଣଙ୍କ ଏହାର ପ୍ରତିବାଦ କରିବାରୁ ଯୁବକ ଜଣଙ୍କ ଏକ ତକିଆ ସାହାର୍ଯ୍ୟରେ ମହିଳାଙ୍କ ବେକକୁ ଚାପି ହତ୍ୟା ଉଦ୍ୟମ କରିଥିଲେ । ମହିଳା ଜଣଙ୍କ ଯୁବକଙ୍କ କବଳରୁ ଖସି ଘର ବାହାକୁ ଆସିଯିବାରୁ ଯୁବକ ଜଣଙ୍କ ଘଟଣା ନେଇ କାହା ଆଗରେ ପ୍ରକାଶ କଲେ କିମ୍ବା ଘଟଣା ନେଇ ଥାନାରେ ଅଭିଯୋଗ କଲେ ମହିଳାଙ୍କ ସ୍ୱାମୀ ସମେତ ୨ ଛୁଆଙ୍କୁ ହତ୍ୟା କରିବାର ଧମକ ଦେଇ ଘଟଣା ସ୍ଥଳରୁ ଫେରାର ହୋଇ ଯାଇଥିଲେ । ଘଟଣା ନେଇ ମହିଳା ଜଣଙ୍କ ଫୋନ୍ ଯୋଗେ ସ୍ୱାମୀଙ୍କୁ କହିବା ପରେ ସ୍ୱାମୀ ଗାଁକୁ ଫେରିଥିଲେ । ଅରୁଣ ଜଣେ ଅସାମାଜିକ ଶ୍ରେଣୀର ଯୁବକ ହୋଇଥିବାରୁ ଭୟରେ ସପରିବାର ମହିଳାଙ୍କ ବାପାଘର ଗ୍ରାମକୁ ଚାଲି ଯାଇଥିଲେ । ପରେ ସାହାସ ଜୁଟାଇ ଘଟଣା ନେଇ ମଙ୍ଗଳବାର ରାତିରେ ମହିଳା ଜଣଙ୍କ ବେଲଗାଁ ଥାନାରେ ଅଭିଯୋଗ କରିଥିଲେ । ଅଭିଯୋଗ ଭିତ୍ତିରେ ବେଲଗାଁ ଥାନାରେ ଏକ ମାମଲା ରୁଜୁ କରି ପୁଲିସ ଘଟଣାର ତଦନ୍ତ କରି ବୁଧବାର ଅରୁଣଙ୍କୁ ଗିରଫ କରିଥିଲା ।
