ଆଜି ଗଣମାଧ୍ୟମକୁ ପ୍ରତିକ୍ରିୟା ଦେଇ ଡାକ୍ତର ମିଶ୍ର କହିଛନ୍ତି ଯେ, ଗଣମାଧ୍ୟମର ରିପୋର୍ଟ ଅନୁସାରେ ଚୀନରେ ବହୁଳ ଭାବେ ଲୋକେ ନିମୋନିଆରେ ସଂକ୍ରମିତ ହେଉଥିବା ନେଇ ଖବର ପ୍ରକାଶିତ ହୋଇଛି । ଅଜଣା ଭାଇରସ ଯୋଗୁ ଏହ ନିମୋନିଆ ସଂକ୍ରମିତଙ୍କ ସଂଖ୍ୟା ବଢ଼ିବାରେ ଲାଗିଛି । କୁହାଯାଉଛି ଯେ ଏହା ଏକ ନୂଆ ଭାଇରସ୍ । ମାତ୍ର ବିଶ୍ୱ ସ୍ୱାସ୍ଥ୍ୟ ସଂଗଠନ ଏହା ନୂଆ ଭାଇରସ୍ ନୁହେଁ ବୋଲି ସ୍ପଷ୍ଟ କରିସାରିଛି । ତେରୁ ଏହାକୁ ନେଇ କେହି ଭୟଭୀତ ହେବାର ଆବଶ୍ୟକତା ନାହିଁ । ଏହି ଭାଇରସ୍ ବହୁଳ ଭାବେ ବ୍ୟାପିଥାଏ । ଏହି ଭାଇରସ୍ ଓଡ଼ିଶାରେ ଥିବା ନେଇ କୌଣସି ସୂଚନା ନାହିଁ । ଭୁବନେଶ୍ୱରସ୍ଥିତ ଆରଏମଆରସି ମଧ୍ୟ ଓଡ଼ିଶାରେ ଏଭଳି ଭାଇରସ୍ ଆସିଥିବାର ପ୍ରମାଣ ନାହିଁ ବୋଲି କହିଛି । ଏଚ୯ଏନ୨ ଭାଇରସରେ ବହୁଳ ଭାବେ ସଂକ୍ରମିତ ହେଉଛନ୍ତି ଚୀନର ପିଲାମାନେ । ସେହି ଭାଇରସରେ ସଂକ୍ରମିତ ପିଲାମାନଙ୍କ ମଧ୍ୟରେ ନିଶ୍ୱାସପ୍ରଶ୍ୱାସରେ ସମସ୍ୟା ଦେଖାଦେଇଥାଏ । ଏହି ଭାଇରସ ଚୀନରେ ବ୍ୟାପକ ଭାବେ ଅନୁଭୂତ ହୋଇଥାଏ । ଏହା କୌଣସି ନୂଆ ଭାଇରସ୍ ନୁହେଁ । ଓଡ଼ିଶାରେ ଏପର୍ଯ୍ୟନ୍ତ ଉକ୍ତ ଭାଇରସ୍ ଚିହ୍ନଟ ହୋଇନି ବୋଲି ଡାକ୍ତର ମିଶ୍ର କହିଛନ୍ତି ।
ପୂର୍ବରୁ ମଧ୍ୟ ଏଭଳି ଭାଇରସ ଏଠାରେ ଅଛି । ଏହା କୌଣସି ନୂଆ ଭାଇରସ ନୁହେଁ । କେନ୍ଦ୍ର ସରକାର ମଧ୍ୟ ଏହି ଭାଇରସକୁ ନେଇ କେହି ଭୟଭୀତ ନହେବାକୁ ପୂର୍ବରୁ ଆଶ୍ୱସ୍ତ କରିସାରିଛନ୍ତି ବୋଲି ଡାକ୍ତର ମିଶ୍ର କହିଛନ୍ତି ।
ଅବଶ୍ୟ ଯେକୌଣସି ପରିସ୍ଥିତିର ସମ୍ମୁଖୀନ ଓ ମୁକାବିଲା ପାଇଁ ରାଜ୍ୟ ସରକାର ନିଜସ୍ୱସ୍ତରରେ ଉଦ୍ୟମ କରିଛନ୍ତି । ଜିଲ୍ଲାରେ ଏଥିପାଇଁ ଅଧିକ ସଂଖ୍ୟକ ବେଡ ପ୍ରସ୍ତୁତ ରଖିବା ସହ ଟେଷ୍ଟିଂ, ପର୍ଯ୍ୟାପ୍ତ ପରିମାଣର ଔଷଧ, ଅକ୍ସିଜେନ୍ ଓ ମାନବସମ୍ବଳ ଆଦି ପ୍ରସ୍ତୁତ ରଖାଯାଇଛି ବୋଲି ସେ କହିଛନ୍ତି ।
