ଘଟଣା ଘଟିଛି ବରମୁଣ୍ଡା ବସଷ୍ଟାଣ୍ଡ ନିକଟରେ । ବସଷ୍ଟାଣ୍ଡ ପଛପାଖରେ ଥିବା କୃତ୍ତିବନ୍ଧୁ ଆପାର୍ଟମେଣ୍ଟର ୨ୟ ମହଲାରେ ଏକ ବିଲଡର ସଂସ୍ଥା ରହିଛି । ଏଠାରେ ମଧୁସ୍ମିତା ଦାସ ନାମ୍ନୀ ଜଣେ ମହିଳା କାମ କରନ୍ତି ।
ଆଜି ମଧ୍ୟାହ୍ନ ପ୍ରାୟ ଗୋଟାଏ ସମୟରେ ସମସ୍ତେ ନିଜ ନିଜ କାମରେ ବ୍ୟସ୍ତ ଥିବାବେଳେ ହଠାତ ମଧୁସ୍ମିତାଙ୍କ ସ୍ୱାମୀ ଅଫିସ ଭିତରକୁ ପଶି ଆସି ପତ୍ନୀଙ୍କୁ ଖୋଜିଥିଲେ । ତାଙ୍କର ଉଗ୍ରରୂପ ଦେଖି କର୍ମଚାରୀମାନେ ଭୟଭୀତ ହୋଇ ଯାଇଥିଲେ । ମଧୁସ୍ମିତାଙ୍କୁ ଦେଖିବା ପରେ ସାଙ୍ଗରେ ଆଣିଥିବା ମାରଣାସ୍ତ୍ରରେ ଆକ୍ରମଣ କରିଥିଲେ । ମଧୁସ୍ମିତା ଜୀବନ ବିକଳରେ ଦୌଡି ପଳାଇବାକୁ ଚାହୁଁଥିଲେ ହେଁ ଆକ୍ରମଣରୁ ରକ୍ଷା ପାଇପାରି ନ ଥିଲେ । ଅଫିସ ସାରା ଗୋଡାଇ ଗୋଡାଇ ଆକ୍ରମଣ କରିଥିଲେ । ଅନ୍ୟ କର୍ମଚାରୀମାନେ ବହୁ କଷ୍ଟରେ ତାଙ୍କୁ କାବୁ କରି ପୋଲିସକୁ ଖବର ଦେଇଥିଲେ ।
ସେପଟେ ମଧୁସ୍ମିତାଙ୍କୁ ରକ୍ତାକ୍ତ ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରାଯାଇଛି । ତାଙ୍କର ଅବସ୍ଥା ଉଦବେଗଜନକ ଅଛି । ତେବେ କାହିଁକି ସେ ଏପରି ଆକ୍ରମଣ କଲେ ତାର କାରଣ କିଛି ଜଣା ପଡି ନାହିଁ ।
